رســــــــــــالــــــــــه مـــــــــــن شهيــــــــــــــــــــد

تاريخ الميلاد : 12/12/1982

كنت نازل عندي حلمي .. زيي زي شباب كتيرة
قبل مانزل بوست أمي .. وكانت البوسة الأخيرة
وامي كانت فاكرة عادي .. هرجع زي كل مرة
قالتلي هستناك مش هاكل .. اوعى تاكل يابني برة
............عاملالك اكلك بايدي .. وابقا هات العيش معاك
بوست ايدها ورحت نازل .. ندهتلي من الشباك
وكانت اخر كلمة منها .. لا اله الا الله
وعدا يوم واتنين وهية .. ميتة من الخوف عليا
شايفة في الأخبار بلاوي .. ضرب نار ومسدسات
حرام عليكو دول ولادنا .. حرام عليكو يا حيوانات
ابني فيهم وكل واحد فيهم ابني .. ابني فين حد يجاوبني
غايب من يوم التلات
فجأة خبّط صحبي بابها .. امي فتحت .. ابني فين ؟!
قول .. رد .. اتكلم .. جاوب .. انطق .. لااااااااااااااااا
ابني مااااااااااااااااااااااااااااااات
هدّوا بيت وهدّوا أسرة .. قتلوا ناس بتبني بكرة
كان أوامر من (( حبيب )) .. ولّا من انسان غريب
المهم ان الخيانة قد ايه احساس رهيب
والنهاردة يوم جنازتي …
زغرطوا متعيطوش .. افرحوا ومعاكو قلبي
خدنا حقنا مالوحوش .. متخافوش أنا عند ربي
ببعتلكوا مليون سلام .. وكل شهدا الثورة جنبي
بيقولولكوا ماتنسوناش .. اوعوا يوم تتخلّوا عنّا
وطمنّوا أهالي اللي ماتوا .. بنحتفل كلنا في الجنة
ابنوا مصر بلاش خراب .. اعملو مليون حساب .. اوعوا حد يخش بنّا
اوعوا موتنا يروح هدر .. احنا موتنا عشان بلدنا
كل شيء فيها انكسر .. صلحوه بإيدين ولادنا
اوعوا يدخل بينكوا فتنة .. دي الوحدة هي ياناس ميزتنا
اخر طلب انا هطلبوا .. أمي تتكرّم في بيتنا

الشهيد / مصري ابن مصري